༄༅། །རག་རྡོའི་བང་མཛོད།

འགྲོ་བའི་མཛའ་བཤེས་ཆེན་པོ་སློབ་དཔོན་རག་རྡོ་མཆོག་སྤྲུལ་རིན་པོ་ཆེ་བློ་བཟང་བསྟན་འཛིན་མཆོག་ནི་ཕྱི་ལོ་ ༡༩༥༦ ལོར་མདོ་སྟོད་ཤོད་ཆེན་བཅོ་བརྒྱད་ཀྱི་ཡ་གྱལ་དཀར་ཤོད་དམ་འབྲུ་ཅུང་པར་སྐུར་འཁྲུངས། དགུངས་ལོ་གསུམ་གྱི་སྐབས་ནགས་ཤོད་སྟག་ཕུ་རིན་པོ་ཆེས་དཀའ་ཤོད་དགའ་ལྡན་ཆོས་འཁོར་དགོན་གྱི་རག་རྡོ་མཁན་ཆེན་གྱི་སྤྲུལ་སྐུར་ངོས་འཛིན་གནང་། རྒྱ་མི་བོད་དུ་སླེབས་རྗེས་བོད་ཀྱི་སྲིད་དོན་དང་ཆབ་སྲིད་ཀྱི་འགྱུར་བ་མཐའ་དག་ལ་མྱོང་བ་ཐོབ། ལྐོག་ཏུ་ཡོངས་འཛིན་དུ་མ་ལས་མདོ་སྔགས་རིག་གནས་དང་བཅས་པར་སྦྱངས་པར་མཛད།

ཕྱི་ལོ་ ༡༩༨༣ ལོར་ལྷ་ལྡན་སྨན་རྩིས་ཁང་དཔེ་རྒྱུན་དཀོན་རིགས་འཚོལ་བསྡུ་དང་ཉམས་ཞིབ་ཀྱི་ཕྱག་ལས་གནང་།

ཕྱི་ལོ་ ༡༩༨༧ ལོ་འཇུག་འཕགས་ཡུལ་དྷས་སྨན་རྩིས་མཐོ་སློབ་ཀྱི་དགེ་རྒན་གྱི་ཕྱག་ལས་གནང་།

ཕྱི་ལོ་ ༡༩༩༣ ལོ་འཇུག་ཏུ་ཝཱཎ་གཙུག་ལག་སློབ་ཁང་གི་སྨན་རྩིས་རིག་སྡེ་གསར་འཛུགས་དང་རིམ་པས་དགེ་རྒན་ནས་སློབ་དཔན་ཆེན་པོའི་བར་གྱི་བྱེད་སྒོ་ཁག་དང་རྒྱུན་དུ་ནད་པར་སྨན་བཅོས། འཛིན་གྲྭར་སློབ་ཁྲིད། བཟོ་གྲྭར་བོད་སྨན་སྦྱོར་བཟོ་དང་ནད་ཐོག་ཉམས་ཞིབ་དང་ལམ་སྟོན་སོགས་ཀྱི་ཕྱག་ལས་གནང་བཞིན་ཡོད། ཁོང་གིས་འདི་ག་གཙུག་སློབ་ཁང་དང་། རྒྱལ་སྤྱི་དང་ས་གནས་རྒྱ་གར་ནང་དོན་གཉེར་ཅན་གྱི་སློབ་གཉེར་བ་དང་ཉམས་ཞིབ་པ་སོགས་ལ་གསུང་གི་བདུད་རྩིའི་འོད་ཟེར་དུས་རྟག་ཏུ་སྤྲོས་མོས་སུ་ཡོད་པ་བཅས་མཛད་རྣམ་མདོར་བསྡུས་སུ་བཀོད་པ་ལགས།
སླར་སྨྲས་པ།
ཡབ་རྗེ་མཆོག
ཐོས་བསམ་སྒོམ་པའི་རང་བཞིན་རྩལ་རྫོགས་པ།།
འཆད་རྩོད་རྩོམ་ལ་ཐོགས་མེད་རྣམ་གྲོལ་བ།།
སྐུ་གསུང་ཐུགས་ཀྱི་ཡོན་ཏན་དཔལ་མངའ་བ།།
བསྒྲུན་མེད་ཡབ་རྗེ་རག་རྡོར་སྒོ་གསུམ་འདུད།།

རིག་གནས་བུ་མོ་བག་མར་བསུ་མཁས་པ།།
གསོ་རིག་དཔའ་བོའི་རྒོལ་བར་འཇིགས་མེད་དཔའ།།
བཅུ་རིག་རབ་འབྱམས་བྱུང་བའི་གནས་གཅིག་པོ།།
ཀུན་མཁྱེན་ཡབ་རྗེ་རག་རྡོར་གུས་ཕྱག་འཚལ།།

སྤྲུལ་སྐུའི་རང་བཞིན་ཟད་མེད་ངོམས་པའི་སྐུ།།
ཆོས་དབྱིངས་རྣམ་པར་བཀྲལ་བའི་འཆད་མེད་གསུང་།།
གཞན་ཕན་སྙིང་རྗེ་དམིགས་མེད་གཡའ་དག་ཐུགས།།
སྐུ་གསུང་ཐུགས་ཀྱི་དཔལ་རྫོགས་ཡབ་རྗེར་གུས།།

བྱོན་པ་ལེགས།

རྒྱ་ཆེའི་ཀློག་མཁན་གྱི་གྲོགས་པོ་ལགས། རག་རྡོའི་བང་མཛོད་ཀྱིས་ཁྱེད་ལ་བོད་ལུགས་གསོ་རིག་དང་རིག་གནས་ཀྱི་གནད་ཀ་ཀུན་ལ་སློབ་དཔོན་ཆེན་པོ་རག་རྡོ་བློ་བཟང་བསྟན་འཛིན་གྱི་གསུང་གི་བདུད་རྩིར་ལོངས་སྤྱོད་ཀྱི་སྤྲོ་དགའ་གནང་ཐུབ་པའི་རེ་བ་ཡོད། འདིར་འཁོད་རྩོམ་ཡིག་རྣམས་ཁོང་གི་དཔྱད་རྩོམ་ཕྱོགས་བསྒྲིགས་༼རག་རྡོ་བློ་བཟང་བསྟན་འཛིན་གྱི་དཔྱད་རྩོམ་ཐོར་བུ།༽ཞེས་པའི་གསོ་རིག་དང་ནང་རིག་གི་ཕྱག་དེབ་གཉིས་པོ་ལས་དྲངས་ནས་རྒྱ་ཆེའི་རིག་པས་བཀྲེས་སྐོམ་གྱི་གནར་བའི་ཀློག་མཁན་གྱི་རིག་པའི་བཀྲེས་སྐོམ་གསོ་བའི་རེ་འདོད་མཆིས།

༄༅། །རག་རྡོའི་བང་མཛོད།

Search This Blog

Friday, 8 March 2019

No comments:

གསོ་རིག་དྲྭ་བ།

བོད་དང་རྒྱ་གར་ནང་གི་རིག་གནས་དྲྭ་རྒྱ།